19岁嘅时候，大家做紧咩？曼联新兵安东尼马菲奥斯，在19岁就已经做老窦。同年仲出咗本讲压力嘅著作，相当早熟，究竟呢位1亿欧元先生，可唔可以同卡斯米路，打破巴西兵喺曼联冇运行嘅魔咒？
安东尼10岁加入圣保罗青年军，上年帮巴西拎咗东奥金牌，代表巴西国家队9次入2球，喺右路用左脚Cut入中路相当耍家。
脚法系有，适唔适应到英超真系要踢过先知，不过安东尼抗压嘅能力同成熟度，就应该几高。安东尼19岁已经成为一子之父，同年仲出咗本抗压书(Overcoming A Real Dream)，用日记形式，分享自己成为巴西新星嘅压力、解决方法。
安东尼嘅早熟，早喺2020年2月转投阿积士前已略见一、二。当时仲踢紧圣保罗嘅佢，已经受到曼城、爱华顿等嘅垂青及问价，但最终安东尼唔想一步登天，选择加盟阿积士，周薪12,000镑，直至转会曼联。
不过，曼联出晒名系巴西球员嘅凶地。2002世杯功臣基巴臣，去到曼联后伤员不断，只系踢咗两季就被卖去土超，之后路尔斯安达臣被费格逊寄予厚望，可惜踢唔出身价，只系后备居多，达施华兄弟、安达斯彭利拿同样失败告终，现时仲喺曼联嘅费特，更被指系毒瘤之一，究竟卡斯米路嘅王者DNA、安东尼嘅超早熟可唔可以打破魔咒？拭目以待。
